Þór/KA sigruðu Fylki 3-1

Almennt - miðvikudagur 11.ágúst 2010

www.thorsport.is

Stelpurnar í Þór/KA báru sigurorð af Fylki 3-1 þegar liðin mættust í 14. umferð Pepsi deild kvenna. Mateja Zver kom heimamönnum á bragðið eftir hálftíma leik og svo fylgdu tvö mörk frá Rakel Hönnudóttur og Vesnu Smiljkovic í síðari hálfleik. Laufey Björnsdóttur lagaði síðan stöðuna fyrir gestina í uppbótartíma en 3-1 sigur stelpnanna okkar staðreynd sem lyftu sér upp í 2. sætið með sigrinum. Frétt frá www.thorsport.is

Sjá má viðtöl við Dragan þjálfara og Berglindi leikmann á heimasíðu Þórs

Leikurinn byrjaði mjög rólega og greinilegt að liðin mættu varnfærnislega til leiks. Í upphafi gekk liðunum illa að halda knettinum og var sóknarleikur liðanna mjög tilviljunarkenndur. Gestirnir úr Árbænum voru þó í við sterkari en náðu þó ekki að skapa sér hættuleg færi. Það voru þó heimamenn í Þór/KA sem náðu forystunni eftir hálftíma leik. Rakel Hönnudóttir komst þá upp að endamörkum og gaf ágætis fyrirgjöf fyrir mark gestanna. Fyrirgjöfin virtist ekki vera hættuleg en varnarmenn gestanna áttu í erfiðleikum með fyrirgjöfina og hittu ekki knöttinn þegar þær reyndu að hreinsa frá marki, sem varð til þess að boltinn barst til Mateju sem var sallaróleg og setti knöttinn örugglega framhjá Björk í marki gestanna. Fimm mínútum síðar voru heilladísirnar á bandi gestanna þegar gott skot Rakel Hönnudóttur endaði í stönginni og út aftur. Fjórum mínútum síðar gátu heimamenn bætt við öðru marki sínu þegar þær léku vel í gegnum vörn gestanna og Rakel var sloppin í gegn en Björk sá við Rakel og varði vel. Hættulegasta marktækifæri Fylkis var þegar aukaspyrna Laufeyjar Björnsdóttur fór rétt yfir mark heimamanna. Þór/KA leiddi leikinn 1-0 í hálfleik.

Stelpurnar okkar byrjuðu síðari hálfleikinn af miklum krafti og uppskáru mark á 48. Mínútu. Danka gaf þá frábæra sendingu inn á Vesnu sem var komin upp að endamörkum og gaf góða fyrirgjöf fyrir markið. Við fyrirgjöfinni tók Rakel Hönnudóttir sem skallaði knöttinn í netið, 2-0. Stelpurnar okkar héldu uppteknum hætti og sköpuðu sér nokkur góð færi en inn vildi knötturinn ekki. Gestirnir áttu eina hættulega sókn þegar þær áttu skot af 25. metra færi en knöttinn hafnaði í slánni. Þrátt fyrir úrvalsfæri náðu stelpurnar okkar ekki að bæta við marki fyrr en á 88. mínútu og þar var Vesna Smiljkovic að verki . Gestirnir pressuðu þá heimamenn aðeins í von um að minnka forskotið. Rakel Hönnudóttir náði að negla knettinum frá og hreinsunin breyttist skyndilega í stungusendingu þar sem Vesna var fyrst að ná knettinum og var skyndilega sloppin í gegn. Vesna fór framhjá Björk í marki gestanna og renndi knettinum örugglega í netið, 3-0 og heimamenn í góðum málum. Vegna meiðsla og skiptinga bætti Halldór Breiðfjörð dómari leiksins 7 mínútum við venjulegan leiktíma. Fylkiskonur náðu að nýta uppbótartímann með því að klóra í bakkann og var það Laufey Björnsdóttir að verki. Fylkiskonur sóttu þá upp vinstri kantinn og komust upp að endamörkum. Boltinn barst þaðan út í teig og vegna misskilnings í vörn Þórs/KA barst boltinn til Laufeyjar sem átti ekki í erfiðleikum með að setja knöttinn í netið, 3-1. Var spyrna Laufeyar síðasta spyrna leiksins og heimamenn fögnuðu því 3-1 sigri.

Stelpurnar eiga mikið hrós skilið fyrir frammistöðu sína í kvöld því þær spiluðu eins og þær eru vanar að spila. Þær fóru í alla lausa bolta af krafti, gáfu ekkert eftir og létu gestina ekki trufla sig í að spila sinn bolta. Gestirnir voru örlítið betri á upphafsmínútum leiksins en eftir fyrstu 20 mínúturnar þá stjórnuðu stelpurnar leiknum, sköpuðu sér nokkur góð færi og með smá heppni hefðu þær geta skorað fleiri mörk. Þær sýndu einnig mikinn karakter með að koma svona sterkar til leiks eftir svekkjandi tap gegn Val í síðustu umferð. Stelpurnar eru nú komnar í smá frí frá deildinni en næsti leikur liðsins er ekki fyrr en 30. ágúst gegn FH.

Viðtal við Dragan Stojanovic þjálfara Þór/KA

Til baka