Almennt - fimmtudagur 28.janúar 2010
Með tilvísan í frétt á N4 þann 20.janúar og mbl.is þann 26.janúar um sparnaðaraðgerðir á FSA fyrir árið 2010,
kom annars vegar fram að konur þyrftu nú að koma með dömubindi með sér á fæðingadeildina og hins vegar að sjúklingar sem koma til
lyfjagjafar á dag- og göngudeild lyflækninga, þurfi að hafa með sér nesti.
Sjúkrahúsið á Akureyri vill hér með leiðrétta þessi atriði sem sett eru fram í fréttinni:
Fæðandi konur þurfa ekki að taka með sér dömubindi á fæðingadeildina. Engin breyting hefur orðið þar á.
Hvað varðar að sjúklingar þurfi að taka með sér nesti þegar þeir koma til lyfjagjafar, þá skal upplýst að lögð er sérstök áhersla á næringu viðkomandi sjúklingahóps og stendur þeim til boða að eigin vali morgunverður, hádegismatur og síðdegiskaffi á meðferðartíma. Aftur á móti er þeim heimilt að taka með sér nesti að heiman ef þeir kjósa það.
Þetta leiðréttist hér með.
